Morgondagens niste

 Blir av og til lei av grovskivene som niste. Bestemte meg for å lage ei god niste til i morgon. Inspirert av måten å lage kanelbrød på, tenkte eg at det kan no gjerast med ost og skinke i staden for.
Så tenkt, så gjort.

Nistebrød med ost og spekeskinke

25 g gjær
100 g gresk yoghurt
2 ss olivenolje (gjerne med smak)
2,5 dl lunka vatn
370 g kveitemjøl
150 g sikta rugmjøl
1 ts grovt havsalt
fyll:
ca. 12 skiver serranoskinke
2 kuler mozzarellaost
1 neve nyraspa parmesanost + litt meir til å strø på toppen
oregano
litt fersk timian (om du har)
raud pesto (eg hadde eit glas med Pesto Trapanese frå Oliviers)

Ha alle ingrediensane til deiga i ein bolle, og elt godt til du har ei fin og glatt deig som slepper bollen. Eg brukar miksar og let han gå i ca. 5 min. La deiga etterheve ein times tid. Når deiga er ferdig heva bakar, du ho ut til ein leiv på ca. 50 x 40 cm. Smør eit tynt lag med pesto. Ha deretter på spekeskinke. Eg la på to skiver i høgda og tenkte på at eg skulle sleppe å skjere i spekeskinka når eg etterpå skulle dele leiven i seks delar. Riv mozzarellakulene og strø utover leiven. Ha over parmesanosten, oreganokrydder og litt fersk timian om du har. Del så deiga i seks delar (horisontalt). Legg dei så oppå kvarandre. Det ser då slik ut.

Gjer klar ei stor brødform med bakepapir i. Så deler du deiga i seks delar ein gong til. Reis opp delane etter kvart som du legg dei i brødforma tett i tett. Strø litt raspa parmesanost på toppen, og ha på litt meir oregano. Set til etterheving i ca. 40 min. Varm opp steikeomnen til 200 grader. Når brødet har heva, steiker du det på nederste rille ca. 45-50 min. Det er nok nydeleg å ete med ein gong, men då er det vel lurt å rive det. Vi måtte smake og venta til det hadde avkjølt seg litt og skar då skiver av brødet. Skal bli herleg niste i morgon saman med ein god salat og litt heimelaga dressing.

Prøv du òg.  ;o))

søndagsmorgon og vinterferie :o))

Laga deiga til søndagens frukostbrød i går kveld. Ei flott heva brøddeig stod klar på kjøkenbenken i dag tidleg.

 Det ligg føre oss ei heil veke med vinterferie, kan ikkje hugse sist vi har hatt det. Koffertane er pakka og vi har ein heil søndag til å kose på oss før vi skal reise. Litt luksus må vi ha, so medan brødet heva og steikte, laga eg "frukostvafler". Når vi er på hytta lagar eg nesten alltid vafler til frukost på lørdag eller søndag morgon. I byrjinga laga eg vanlige søte vafler med kveitemjøl. Etter kvart har eg laga meg ei oppskrift eg tykkjer passar betre til frukost. Nesten uten sukker og med grovt mjøl. Litt sunnare med andre ord, men på ingen måte dårlegare. :o))

Mariann sine FRUKOSTVAFLER
2 egg
0,5 dl sukker
2 gode ts bakepulver
5 dl lettmjølk
ca. 3/4 boks lettrømme
1,5 dl kveitemjøl
5 dl fibramjøl (fullkornskveitemjøl)

Bland saman egg, sukker, lettrømme og bakepulver. Ha i lettmjølk og mjøl og visp til ei glatt røre. Eg brukar ikkje feitt i røra, men smør jarnet med litt olivenolje undervegs. Kjempegode vafler, og det vart ingen sure miner i heimen den gongen eg byrja å lage desse grove vaflene i staden for dei tradisjonelle. Vi synest dei er kjempegode med iskald rørt bringebærsylte på.

 

So då vart det ein fin søndagsfrukost med nybakt brød og vafler.

So har eg eit lite tips til søndagskaffien. ;o))

 Mormor Josefines vidunderlige kanelbrød, etter oppskrifta til Monica Csango. Oppskrifta står i kokeboka hennar, til å spise opp og ho ligg ute på bloggen hennar også. Ein festlig vri på gjærdeiga og artig å lage!

Slik såg resultatet mitt ut eine gongen eg laga det ...

... kjempegodt og saftig. Og det varer ikkje lenge, for dette får føter å gå på ... :))

Anbefalast! ;o)))

I bakaromnen står leirgryta mi full med gode grønsaker og hjortekjøt og det byrjar å lukte deilig. So etter ein god middag reiser vi til by'n og grytidleg i morgon set vi kursen for England og gledar oss til å besøke eldste guten vår som er i England på skule for tida.

Då skal eg gje meg for i dag ;))

Pizzabollar

Herlig med fredagskveld og frihelg. ;)) Middag og fredagskos vart enkelt og greitt pizzabollar. Det er lenge sidan eg har laga. I dag skreiv eg ned oppskrifta, elles blir dei berre laga kanskje ikkje på tilfeldigheita, men ut i frå erfaring heiter det vel. ;)) Dei er nok aldri heilt like. Kjøttsausen varierar nok mest, alt etter kva eg har i hus.
Slik blei oppskrifta i dag:

Pizzabollar

ca 25 stk.

Deig:

25 gr gjær

3-4 ss gresk yoghurt

2 ss god olivenolje(gjerne med smak av krydder el sitron)

1 ts havsalt

600 gr kveitemjøl

300 gr sikta spelt

ca. 5 dl vatn

Lunk vatnet litt, bland alle ingrediensane i ein bolle og elt til du får ei fin og smidig deig, juster

litt sjølv, men ikkje lag ho for fast. Dekk ho til og la ho heve til dobbelt storleik. Tar litt tid med so lite gjær.Trur mi stod 1,5 til 2 timar, gløymde heilt å sjå på klokka. ;((

Fyll:

1 pk kjøttdeig

1 rødløk

2 fedd kvitløk

½ rød el grøn paprika

1 stilk stangselleri

1 boks knust tomat

1 dl vatn

1 liten neve fersk oregano

pepar

ca 2 ts havsalt

1 ts basilikum

2 ts provancekrydder

½ liten boks mais

Finhakk rødløk og kvitløk. Steik kjøttdeig og ha i rødløk og kvitløk. Steik vidare til løken er blitt blank. Del stilksellerien opp i tynne skjever og paprikaen i små terningar. Ha det opp i kjøttdeiga. Ha so i knust tomat, vatn, oregano, basilikum og provancekrydder. Smak til med salt og pepar og la det småputre til du har ein tjukk saus, ca 5-10 min. Ha i maisen til slutt. La det kjøle seg ned medan deiga hever.

Når deiga er ferdig heva baker du ho til ein stor rektangulær leiv. Pass på at deiga ikkje set fast i bordet. Ha på kjøttfyllet, reven ost og evt. litt oregano. Rull saman og skjær opp. Legg dei på eit steikebrett med bakepapir på og steik dei ca.15 min på 225 grader.

Det ferdig resultatet såg slik ut.

Det er godt med ein liten salat til også, men dei står seg godt åleine og idag vart det kjapt slik då eg skal lage nokre kaker til bursdagsfeiring på søndag. ;o))

Mariann si tomatsuppe

I går var det berre eg og husbonden som skulle ha middag og då vart det ei heimelaga tomatsuppe med foccacia. Foccaciadeiga laga eg før eg gjekk på jobb om morgonen so ho hadde stått og godgjort seg heile dagen. Det fyrste eg gjorde når eg kom heim var å få ho til etterheving. Her er foccaciaen klar for omnen.

Suppeoppskrifta kjem her:

MARIANN si TOMATsuppe

ca 3 pers.

3 sjalottløk

¼ chili uten frø(den eg hadde var stor)

2 fedd kvitløk

1 kyllingbuljongterning

2 boksar knust tomat, eg brukte Mutti sine

4 dl vatn

1 liten neve med fersk, hakka oregano og timian

1 knivsodd smoked paprika krydder

2 dl matfløyte

Finhakk sjalottløk, chili og kvitløk. Ha litt olje i ei gryte og fres sjalottløk, chili og kvitløk til løken blir blank. Ha på knut tomat, vatn og smuldre i buljongterningen. Ha i ein liten neve med fersk, hakka oregano og timian.Det går nok bra med tørka krydder om du ikkje har ferske krydderurter. Litt nykverna pepar, litt havsalt og ein knivsodd smoked paprikakrydder. Smak deg fram. La det småkoke i ca. 20 min, ha i matfløyta og la det koke med dei siste 10 min. Viss ein ynskjer suppa glattare kan ein køyre den litt med ein stavmiksar.

Server med egg og parmesanost eller det du måtte ynskje. Hugs eit godt brød til :)) gjerne ein god foccacia.

Eg var i Bergen i helga og her er det eg handla med meg heim ;))

Eg har lenge vore på jakt etter Emmermjølet til Holli Mølle, dessverre er det ingen i Førde som har det. Eg har i alle fall ikkje funne det. Var difor godt fornøgd når eg fann det på tur til by'n. So då blei det mjøl og litt olivenolje som blei med heim og eg var godt fornøgd med da.

Måtte jo lage eit lite testbrød, brukte berre litt av det grovmalte Emmermjølet i brødet og brødet vart veldig godt. Skal ha i meir neste gong. Her er oppskrifta på testbrødet mitt:

TESTBRØD av EMMERmjølet

50 gr sesamfrø
100 gr Emmermjøl, grovmalt
400 gr kveitemjøl
12,5 gr gjær(1/4 pk fersk)
1 ts honning
2 ss tyrkisk yoghurt
2 ss god olivenolje
2,5 dl lunka vatn
1 ts havsalt

Rist sesamfrø i tørr steikepanne, til dei får litt farge. Avkjøl dei. Ha gjær, honning, olivenolje, yoghurt og lunka vatn i ein bolle. Bland litt. Ha i mjøl, frø, salt og elt godt i miksaren til du har ei glatt fin deig.
Set til heving til dobbel storleik, tar ca eit par timar. Ha evt. meir gjær i viss du har lita tid. Når deiga er heva tar du ho ut på bordet og eltar/formar ho lett til ein stor bolle, la ho ligge på bordet tildekka ein 20-30 min. Form so til eit lite brød og legg i ei lita brødform, fukt brødet og strø på litt sesamfrø viss du ynskjer. Etterhev ca. 30 min. Eg steikte det fyrst 5 min. på 250 gr og so skrudde eg ned til 190-200 gr og steikte det ferdig, ca 40 min. Eg pleier banke på det og sjekke lyden før eg tar det ut.

Det var kjøkkenkosen i går.

Yes, då skal eg kose meg og la meg inspirere av nokre flotte bøker. Gledar meg! :o))

Hei og hå det er vår....

... på kalendaren min iallefall. Halloen, eg er oppe og går som vanleg :)), berre litt sløv når det gjeld å ta bilete og lage blogginnlegg. Vekene går fort og vinteren har vore fantastisk ikkje verken snø eller regn, det passar meg ypperlig. Vêret har no snudd, men vi treng nok regn og mildvêr viss det skal bli vår. Men den er no i emning, det kjenner eg på meg, for med våren kjem reiselysta og eg føler meg innestengt her eg går, blir rastlaus... Har diverre ikkje pengar og fri til å reise slik eg skulle ynskje, men det er lov å drøyme. Eit par turar er allereie bestilt og under planlegging og det kosar eg meg med. So eg har ikkje vore so produktiv akkurat, bortsett frå på kjøkkenet der finn eg roen og gleda.

I vinterferie kjøpte vi oss ei pastamaskin og her er nokre biltete frå fyrste gongen vi brukte den. Då lagde vi ravioli. Fyllet lagde vi utan oppskrift, men det smakte godt. So lagde vi ein god tomatsaus og hadde godt brød til. Kjempekjekt å lage eigen pasta, den smakar veldig godt. Kan verkeleg anbefalast. Eg skulle gjerne hatt ei litt meir avansert pastamaskin som kan lage fleire typar, men alt til si tid, vi får begynde med det enklaste. Eg brukar italiensk durumkveite. Har laga tagliatelle nokre gonger,  for eg har funne ei oppskrift på ein god kjøttsaus, som skal koke lenge. Den har ein kraftig, god smak og det synest eg ein pastasaus skal ha. So heimelaga pasta, god heimelaga kjøttsaus og nysteikt brød, det er alt ein treng for å kose seg ved bordet både vel og lenge. Det tar jo litt tid, men er ikkje vanskelig.

Vi har hatt sommarferien vår ganske ofte i Spania i løpet av dei tolv siste åra og her ein kveld kom eg på noko enkelt og godt vi av og til kjøpte til lunsj eller også til middag med salat, viss vi ikkje gadd å gå ut og ete eller ho mor(meg) ikkje hadde planer for middagen. Det var ein oval brødkrans fylt med pølse, spekeskinke eller kokt skinke og ost av diverse slag. Den var vakumpakka og berre å putte i bakarovnen nokre minutt. Heilt enkelt uten saus eller krydder.  Her ein kveld kom eg på at eg skulle laga min variant av Rosca som det heitte der nede. Min variant vart italienskinspirert! Eg steikte eit par brødkransar og avkjølte dei. So delte eg kransen og smørte på med litt god tomatpesto frå Oliviers og Co., du kan ha ein god pizzasaus eller liknande på også. So la eg på litt god spekepølse(Tind si spekespølse med sydlandske urter er fantastisk god) på eine halvdelen og restar av den italienske spekeskinka eg kjøpte i Italia i fjor på den andre halvdelen. Det er masse gode italienske og spanske spekeskinker å få kjøpt her, dei kostar litt, men er vel verdt det, synest eg. Til slutt la eg på fersk Mozzarellaost og litt urtekrydder. Inn i ovnen i ca 10 min eller til osten har smelta. Har du pizzastein bruk den. Det vart knasande sprø skorpe og det smakte ferie :))

Lurt å bake eit par ekstra brød når ein held på og so putte i frysaren. Då tar det ikkje so lang tid å lage seg noko godt!

Palmelaurdag var eg og Johan på hytta åleine. Det var nydelig vêr og då opna vi årets grillsesong.
Vi gjorde da enkelt med ei lita flintsteik, ein bukett brokkoli og nydelig potetsalat laga av nypoteter med gresk yoghurt, masse fersk rosmarin, kvitløk, ein skvett sitron, litt god olivenolje og litt krydder. So enkelt, men likevel nydelig.

Palmesøndag hadde eg lovd svigerinna mi brød til ei bursdagsfeiring. Det vart jo alt for mykje brød, men når ei fyrst fyrer opp steinbakarovnen må ein bake litt meir enn tre brød. Og resten kunne dei berre putte i frysaren.

 Nokre av deigene hadde eg laga kvelden før. Det var lenge sidan vi hadde fyrt opp ovnen so eg storkosa meg og det gjorde fyrbøtaren også ;))

 Påska stod i bakarovnens teikn. Og familiens teikn sjølvsagt, ein stor del av gleda ved å bake eller vere på kjøkkenet er jo nettopp å glede andre med eit godt måltid. På hytta har vi ope kjøkken slik at eg kan sjå rett ned i stova og prate med dei andre og det er supert. Bakarovnen vart fyrt opp kvar morgon og eg berekna middag som kunne lagast i bakarovnen. Det vart steikt alt frå lambelår, kylling, grønnsaker, poteter, paiar, brød og bollar. Skulle berre ha tatt litt fleire bilete.

Påska var jo fantastisk, kan ikkje hugse sist vi har hatt so fint vêr i påska. Vi kosa oss ute og inne. Og masse besøk hadde vi også! Skjærtorsdag hadde vi tradisjonen tru påskelunsj for mine sysken med familie, då var vi 25. Då begynder det å bli liten plass, men alle fekk mat og eg trur alle kosa seg, det var iallefall spørsmål om eg var klar igjen  til neste år? :)) Langfredag og påskeafta hadde vi også middagsbesøk, men då var vi berre 9..

Det var lite snø i fjella og dårleg føre, men det var desto meir trafikk på isen. Eg har aldri vore med på ei påske i Haukedalen med reine folkevandringa på isen. Det var nokon som hadde fiska og målte isen til 1 meter og då torde sjølv eg meg utpå den. Er nemleg generelt skeptisk til å gå på islagde vatn.

Her er vi på isen og ser innatt til hytta og "bakeriet".

Måtte berre oppatt helga etter påske for å bake litt meir. Kunne ikkje bruke nokon av påskedagane til den store bakedagen :))

 Til slutt eit bilete av ein kjole/tunika eg har laga. Brukte mønsteret til Pickles. Trur den passar i str. 1 år, la med ein rosa og kvit body og ei rosa strømpebukse, håpar det kan bli brukande. Held på med nokre tubesokkar, men det går seint... Held for tida på med nokre gode bøker og då sluker dei meg heilt og so må eg lage konfirmasjonskort neste veke.

 Ha ei ein fin søndag!

Mariann

Lett miks!!

Då var det helg igjen, har hatt arbeidshelg, men det er heilt greitt når vi no berre jobbar kvar tredje helg. Det er rett og slett fantastisk herleg. Innlegget blir ein lett miks som vanleg. Legg også ut nokre oppskrifter, viss noko eg har laga kan freiste ;)) Kjekt at nokon legg igjen kommentarar og spør om oppskrifter.

I dag har eg vore flink synest eg og skrive ned fleire oppskrifter. Fredag var det reke- og krepsesalat med nybakt brød som stod på menyen. Skunda meg heim frå jobb og laga salat og deig til brødet. So var det ut og trille ein storsekk med ved oppom huset medan deiga heva, puuh... det gjekk akkurat. Oppskrifta på salaten har eg fått av ein kollega og so har eg tilpassa den litt slik det passar meg. Brødet prøvde eg å lage med tanke på at det skulle passe til salaten. Oppskriftene ligg under bileta.

Reke- og krepsesalat. (4-5 personar)

250 gr tricolor pastaskruer
1 gulrot
1/2 raud paprika
1/2 grøn paprika
1-2 fedd kvitlauk
1/2 raud lauk
1 boks krepsehalar
2 boksar reker (ca 400 gr)
3/4 liten rund fiskepudding

Dressing:
1 beger lettrømme
1 1/2 dl lettmajones
salt
nykverna svart pepar
litt kraft frå rekeboksen
gjerne nokre dråpar med sitronsaft viss du har liggande ein sitron på lur.

Kok pastaen med litt olje i vatnet og avkjøl. Del gulrota i tynne strimlar. Del paprikaen i strimlar. Press eller finnhakk kvitlauken. Del raudlauken i små bitar. Og del opp fiskepuddingen. Bland alt i ei skål, hald gjerne av litt reker og krepsehalar til pynt. Bland dressingen, smak deg fram med salt og pepar. Eg brukar ikkje mykje salt, for rekene og krepsehalane er salt nok nesten. Bland deretter dressingen i salaten. Lag den gjerne i god tid slik at han får stå i kjøleskåpet og godgjere seg. Den er like god dagen etter!

Server den med godt brød.

Her er oppskrifta på brødet eg laga. Eg miksa i hop ei deig eg tenkte ville passe til smakane i salaten, og det vart ikkje so verst det :) Prøvde å notere meg kva eg brukte, pleier oftast berre blande det eg kjem på.

"Fiskebrød"
3,5 dl vatn
ca 600 gr kveitemjøl
25 gr gjær
1 ts dill
2 ts tørka persille
1 ts halvsalt
2 ss olivenolje, gjerne olivenolje med sitron i
1 dl tyrkisk el gresk yoghurt
 Fyll:
Litt svarte oliven
2 fedd pressa kvitløk

Lunk vatnet litt. Ha mjøl i ein bolle, smuldre i gjær. Ha i dill,persille, salt, olivenolje og yoghurt. Bland i vatnet og elt deiga godt. Juster med mjøl el vatn alt etter som, ikkje lag for fast deig. Hev ein times tid. Etter heving klappar/kjevlar du deiga utover. Eg hadde på litt svarte oliven og to fedd pressa kvitløk.Viss du ikkje vil ha i oliven kan du evt. ha kvitløken i deiga når du lagar den. Eg slit litt med å like oliven, men eg har ein i huset som tykkjer det er godt. Eg hadde ikkje so store mengder i og dei kunne lett plukkast ut. Rull deiga saman og ha det i ei godt smurt form. Eg burde ha brukt ei større form. Pensle med litt vatn og strø på valmuefrø. Etterhev ein 20-30 min. Steikast på ca. 190 grader i 35-45 min.
La brødet avkjøle seg på rist og nyt eit godt måltid!

So har eg gjort ferdig sokkane eg lovde husbonden. Har strikka ei enkel kvardagshue til han også, håpar ho blir brukande. Skal strikke ei hue i brunt til han, men må finne meg eit mønster eg vil bruke. Hua er strikka i Nepal(Drops), eit herleg garn.

Laurdagsmiddagen vart ei suppe som eg likar godt. Eg er veldig glad i supper, men vi har det altfor sjeldan då yngstemann i huset, meiner at suppe ikkje er middag. Han er vekkreist i helga so då benytta vi sjansen ;))

gu

Eg laga ei Gulasjsuppe og eit brytebrød til. Oppskrifta på gulasjsuppe har eg frå ei gamal suppebok  til Norske Meierier. Oppskrifta kjem her:
Gulasjsuppe
Det står 4 pers. i oppskrifta, men eg vil sei her blir rikelig suppe til 3, men forlite til 4.
3 poteter(eg pleier bruke både 4 og 5 alt etter storleik)
1 raud paprika
2 løk
1 fedd kvitløk
1-2 ss smør(el olje)
200 gr(gjerne litt meir) beinfritt oksekjøtt, f.eks. rundbiff

3 ss tomatpure
6 dl kjøttbuljong(eg brukar vatn og 1 1/2 buljongterning)
4 dl lettmjølk
2 ts paprikapulver
1 ts oregano
salt
pepar
persillegrønt
1. Skrell poteter og løken. Skjær potetene i skjever og hakk løken. Skjær paprikaen i strimlar og kjøttet i små terningar.
2. Fres løk og kvitløk i litt smør eller olje. Ha det over i ei gryte/panne. Steik så kjøttet litt, la det såvidt ta farge. Ha det oppi gryta saman med løken.
3. Rør inn tomatpure. Ha i potetene og paprikaen. Tilsett buljong og mjølk. La suppa koke i ca. 15 min. til potetene er møre.
4. Smak til med salt, pepar, oregano og paprika. Pynt med persillegrønt.

Nydelig supe som eg anbefalar, kan gjerast ferdig i god tid, gjerne dagen før og so berre varmast oppatt før bruk. Eg har laga ho mykje både til oss sjølve og i større lag. Lagde den blant anna til min 40-års dag og då var vi over 60 personar.

Her er resultatet

 Brødet eg laga var ei oppskrift er fann på nettet på Passion 4 baking.(Nydelig blogg det er vert å ta ein kikk på.) Har fått forespørsel på oppskrifta på Focacciabrødet, eg skal legge ut oppskrifta på Focaccia ein dag seinare :)

I går kveld og natt var min kjære på jobb og yngste mann på tur. Eg sat difor åleine og kosa meg so godt eg kunne. Eg hadde ikkje problem med det. Eg har bøker på gong...

Det blir nok både vinter og vår før eg blir ferdig, har ikkje nok timar i døgnet...

So har eg fått eit par nye blad i posten denne veka som eg har spart til helga. Og ikkje minst kunne eg sette i gang med nytt strikkeprosjekt, rakk nok ikkje alt i går kveld nei, men det er jo søndag i dag og nok ein dag til å kose seg...

I dag har vêret slått om og det bles godt ute, tenkte eg skulle ha meg ein tur ut, vi får sjå det an, viss ikkje står tredemølla klar til bruk.....

Nyt søndagen!!

Mariann

Kosekveld, les bakekveld :)

 Frysaren var ganske tom for rundstykker so då tenkte eg at baking var tingen i kveld. Ute har det vore sur vind, regn, sludd eller snø alt etter som...... akkurat passe dårlig vêr til å vere inne med god samvittigheit og kose seg med litt baking og strikking........... Sette to deiger når eg fyrst var i gong, ei kveitedeig og ei grov deig. Kjekt å finne i frysaren ;)

Måtte berre leike meg litt ti-hi....

Her er strikkeprosjektet mitt, vart visst eit rotet bilete, men eg gadd ikkje ta nytt for no vil eg strikke litt, skal ta eit betre bilete når eg er ferdig. Gjett kva det skal bli.....

Ha ein herlig kveld!!

Mariann