fredag 4. april 2014

Bakt potet med noko attåt ...

Deilig med fredag og frihelg. Vi er glad i steikte grønsaker her i huset, som de kanskje har sett av tidlegare innlegg. :)) I dag var det bakt potet med steikte grønsaker og steikt hjorte-/oksekjøtt. Du kan velge kjøt og grønsaker etter smak og behag, eg brukte dette:

Bakt potet med noko attåt
4 pers.
ca. 500 g hjortekjøt
ca. 300 g  møyrt storfekjøt (entrecôte f.eks.)
litt grilloljemarinade
peparmix
viltkrydder
paprikakrydder
ein skvis med limesaft

ca. 1,5 paprika, raud, grøn eller oransje, delt i skiver.
1 lauk i tynne båtar
1 raudlauk i tynne båtar
ca. 1 squash, delt i ikkje alt for store betar
2 fedd kvitlauk, finhakka
1-2 gulrøter, delt i tynne, lange strimlar
1 brokkoli, delt i små bukettar
ca. 2 ss fersk timian, finhakka
nykverna pepar
salt

ca. 1 stor potet på kvar. Eg har mine i ei ildfast form og set dei på ca. 15 min. i mikroen. Når dei er ferdig pakkar eg dei inn i litt aluminiumsfolie. 

Del kjøtet i passelege betar. Ha på litt marinade, litt peparmix, viltkrydder og paprikakrydder. Bland det godt med kjøtet og la det stå eit par timar og godgjere seg. Varm så opp steikepanna med litt olje. Steik kjøtet kjapt på god varme i eit par omganger. Set det tilside på ei plate med litt varme og la det ettersteike, medan du steiker grønsakene. Ha litt olje i ei steikepanne eller ei wokpanne og steik grønsakene over god varme nokre få minutt. Ha på litt nykverna pepar, fersk timian og litt salt. Eg har ei saltkvern med grovt salt, sitron og rosmarin. Har du eit kryddersalt så bruk litt av det. Ha ein skvis med limesaft på kjøtet rett før servering og smak til med evt. meir krydder.

Då skulle det vere klart til servering.  Bakt potet med ein god klatt lettrømme og litt grovkverna pepar, nydelige grønsaker og møyrt og godt kjøt som nesten smeltar på tunga.

Mmm ... ein god start på helga! :o))










søndag 30. mars 2014

Gateau Marcel, sjokoladedraum ... :))

Sat og såg i nokre gamle blad her ein dag og kom over oppskrifta på ei sjokoladekake med namn Gateau Marcel. Hadde merka ho av for lenge sidan, med ho må prøvast. Såg litt på oppskrifta og tenkte med ein gong at her kan eg tilsette ein liten skvett Cognac. Eg drikk ikkje Cognac, men ein ørliten skvett Cognacsmak i lag med sjokolade er nydelig. Oppskrifta var ikkje supergod, det stod blant anna ingenting om storleik på kakeforma, men eg tenkte her er det berre å gjere eit forsøk. 

Mariann sin versjon av Gateau Marcel
350 g sjokolade (eg brukte 3 plater 70% kakao og 1/2 plate lys kokesjokolade)
350 g smør el. margarin
350 g sukker
2,3 dl eggeplommer (ca. 10 egg)
3 dl eggekviter
sukker og smør til forma

2 ts cognac til moussen (topplaget)
litt amarettokjeks til toppen (oppskrifta sa kakao)

 Eg brukte ei 22 cm form, men tenkjer eg tar ei 24 cm neste gong. Smør forma og strø den med sukker. Smør/margarin og sjokolade smeltast. Eggeplommer og 230 g av sukkeret piskast til luftig eggedosis. Pisk eggekvitene stive og tilsett resten av sukkeret og pisk det inn. Vend smør og sjokoladeblandinga inn i eggedosisen. Vend så forsiktig inn eggekvitene. Ta halvparten av røra i springforma og steik på 160 grader i 30-35 min., nede i omnen. Ho er ferdig når ho begynder å sprekke på toppen. Ta kaka ut av omnen, og avkjøl kaka på rist ein halvtime og set ho så i kjøleskåpet eller frysaren for å få den raskt avkjølt. La kaka vere i forma. Den fell saman og det skal ho gjere for å få plass til resten av moussen. Eg blanda 2 ts Cognac i moussen som skal vere på toppen og sette han i kjøleskåpet. Når kakebotnen er kald, har du på moussen. I staden for å sikte på eit lag med kakao knuste eg nokre amarettokjeks i blenderen og strødde på toppen. Set kaka til avkjøling nokre timar, helst natta over.


Kaka smakte fantastisk godt, men må nytast i små mengder, ho er mektig. Ho kan serverast åleine eller saman med litt is og bærsaus. Eg kan tenke meg at ferske, norske jorbær vil smake himmelsk saman med denne kaka!





lørdag 29. mars 2014

Fransk lammegryte og surdeigsbrød ...


På menyen i kveld stod det Fransk lammegryte med omnssteikte poteter og surdeigsbrød med valnøtter og timian.
Det starta med mating av surdeiga laurdag morgon. Eg vart litt sein før eg kom i gong med deiga til brødet så eg juksa litt og tilsette pittelitt gjær, slik at eg skulle vere sikker på at brødet vart ferdig.

Surdeigsbrød med valnøtter og timian
1 brød
50 g sesamfrø
100 g durum kveitemjøl
300 g kveitemjøl
100 g sikta rugmjøl
50 g valnøtter
1 ts. havsalt
1 ts. akasiehonning
3,5 dl vatn, litt lunka
200 g surdeig
5 g fersk gjær
2 ss olivenolje
2 ss hakka, fersk timian

Bland alt unntatt valnøttene og køyr i miksaren ca.10 min. Ha oppi valnøttene dei siste to minuttane. Deiga skal sleppe bollen, men vere litt klissete. Hev til dobbel storleik. Eg let mi stå i ca. 4 timar. Ha deiga på eit bakebord med litt mjøl. Form den med lett hand og legg ho i ei godt mjøla hevekorg. La ho så etterheve ein time eller to. Har du pizzastein set du han nede i omnen. Set omnen på 250 grader. Kvelv brødet forsiktig ut av hevekorga, skjær eit par djupe snitt i deiga og set brødet i omnen. Ta 0,5 dl varmt vatn og hiv inn i omnen når du set brødet inn i. Steik 5 min. på 250 grader, slå så omnen ned på 200 grader og steik i 40 min. til.
Sjekk brødet når du tek det ut ved å banke på det. Har du ein hul lyd er det ferdig. Avkjøl brødet på rist. Surdeigsbrød får ei supergod og knasande skorpe.

Fransk lammegryte med omnssteikte poteter. Eg tok utgangspunkt i Trines matblogg si oppskrift og gjorde litt endringar.

Fransk lammegryte med omnssteikte poteter
4 pers.
1 kg lammekjøt, bog eller lår
12-15 sjalottlauk (eg hadde oppi nokre mini raudlauk i tillegg)
4-5 gulrøtter, i litt store betar
4 fedd kvitlauk, hakka
2-3 dl vatn
2 dl raudvin
1 boks hermetiske tomatar (gjerne mutti)
1 boks bønner i tomatsaus
ein liten neve fersk, hakka timian
litt fersk, hakka rosmarin
ca. 1/2 chili uten frø, finkutta
maldonsalt og nykverna pepar
1 laurberblad
ca. 2 ss god balsamicoeddik

8 poteter, delt i to
olivenolje
maldonsalt
nykverna pepar
eit dryss med litt fersk timian og rosmarin

Steik kjøtet i to omgonger. Ha det over i ei gryte/panne. Kok ut panna med litt av vatnet kvar gong og hell det over kjøtet. Fres hakka kvitlauk, heile sjalottløk og gulrøtene. Ha det opp i gryta med kjøtet. Ha i resten av evt. vatn, raudvin, knust tomat og krydderet. Kok opp og la det småkoke i 1,5 - 2 timar, til kjøtet er møyrt og slepp beinet. Når kjøtet er ferdigkokt tilset du tomatbønnene, balsamicoeddik og evt. meir krydder. La tomatbønnene bli varme før du serverer.

Medan gryta småputrar gjer du klar potetene. Du kan fjernet skalet om du vil. Eg hadde nye fine amadine poteter og let skalet vere på. Del potetene i to og pensle dei med litt olivenolje. Eg brukte ein god olivenolje med kvitlauk. Dryss på litt maldonsalt, kvern over litt pepar og ha på litt timian og rosmarin. Steik dei midt i omnen i 40-45 min. til dei har fått fin farge og er møyre.


Det skulle då vere klart for eit nydeleg måltid mat. Kjempegod lammegryte, steikte poteter og knasande godt brød, kanskje med litt smør på. Dypp det i alle fall i sausen og nyt. :))  Litt dessert blei det også. Gateau Marcel (sjokoladekake) med min vri, oppskrifta kjem i morgon, tenkjer eg.









torsdag 27. mars 2014

Mot helg ... og ein god middag.


I dag var eg ferdig på jobb klokka 18.00, men lysta på ein god middag var stor. I dag vart det steikte potetbåtar i omnen, marinert og steikt kylling med grønsaker. Det høyrer også med ein god dip til potetene. Det er ikkje så mange ingrediensar som skal til, men det smakar nydeleg.


Kyllingsnadder
3 pers.
4 kyllingfiletar, delt i litt store betar (ein munnfull)
Eg skulle sikkert ha laga marinaden sjølv, men eg synest Toro sin italienske marinade i posar er veldig god til kylling og ferdig til bruk. Du kan også bruke ein annan grillmarinade som du likar eller har i kjøleskåpet.
Eg brukte i alle fall ein pose med italiensk marinade og hadde på kyllingbetane. Så let eg det stå ein liten time medane eg steikte poteter, klargjorde grønsakene og lagde dippen.

6 litt store poteter eller fleire små (amadine eller andre fine poteter)
1/2 chili, finkutta
2 kvitlauksfedd, finkutta
potetkrydder eller anna god krydderblanding som f.eks provencekrydder ...

olivenolje
maldonsalt
nykverna pepar
1 ss fersk timian, kutta (om du har)

Set omnen på 225 grader. Del potetene med skalet på, i båtar. Legg dei i ei ildfast form og ha på litt olivenolje, chilien, kvitlauken, salt, pepar og potetkrydder. Bland det godt med hendene, og ha på timian på toppen og set det midt i omnen. Steikast i ca. 35 min., til dei er gjennomsteikte og har fått fin farge.

1-2 raudlauk
1/2-1 raud paprika
3 vårløk + 1 til pynt
Medan potene steiker og kjøtet ligg i marinade kuttar du opp grønsakene. Del opp raudlauken i små båtar, paprikaen i strimlar og vårløken i ca. ein centimeter tjukke skiver. Set til side.

Dip
2 ss tyrkisk yoghurt
2 ss lett majones
2 ts søt chilisaus
ei klype karrikrydder
Bland dette i ei lita skål og la det stå og godgjere litt.

Når det er ein 10-15 minutt att av steiketida til potetbåtane steiker du kjøtet og grønsakene. Ha litt olje på steikepanna og steik kjøtet i fleire omganger, nesten ferdig. Ha alt tilbake i panna. Krydre med litt maldonsalt, nykverna pepar, toscansk krydderblanding og ørlite fajitas krydderblanding. Ha i grønsakene og steik dei med siste minuttane. Strø på den siste vårløken like før servering.

Då er det berre og sette seg ved bordet for å nyte ein god middag og ein koseleg prat. ;o))











fredag 21. mars 2014

Wok med østerssaus


Middagen i går var wok med grønsaker og svinekjøt. Knasande grønsaker og kjøt med østersaus og ris. Mmm ..... det er kjempegodt. I wok er det berre å velge kjøt og grønsaker etter eigen smak. Denne woken er kanskje aller best med oksekjøt, men det er jo ikkje akkurat billeg. Valget falt på svinekjøt i går (kylling er også godt). Oppskrifta mi er slik:

Wok med østerssaus
4 pers.
500 gr svinekjøt
1/2 raud paprika i strimler
1/2 grøn paprika i strimler
2-3 løk, alt etter storleik, delt i litt tynne båtar
1 raudlauk, delt i litt tynne båtar
2 store gulrøter, delt i tynne skiver på langs
1 bunt broccoli, delt i små bukettar
1 liten boks vannkastanje i skiver
1 liten boks bambusskudd
1 kjøtbuljongterning
1 dl vatn
3,5 dl østerssaus
nykverna pepar


Skulle ynskje eg hadde gassbluss når eg skal lage wok, det blir liksom aldri varmt nok med vanleg elektrisk kokeplate. Eg gjer det difor på denne måten:

Skjær opp alle grønsakene og ha dei klar. Ha litt olje i ei steikepanne og steik kjøtet i fleire omganger, nesten ferdig. Ha litt olje i wokpanna og varm godt opp, ha i grønsakene bortsett frå vannkastanjane og bambusskudda og la dei frese nokre minutt, men ikkje meir enn at dei framleis er sprø. Tilset så kjøtet, ein knust buljongterning, vatnet, østersausen, skylte vannkastanjer og bambuskudd. Bland godt og la det putre nokre få minutt. Ha på litt nykverna pepar. Server med jasminris.


Enkelt å lage, utruleg herleg med alle dei friske fargane på tallerken og kjempegodt. Då skal fredagskvelden nytast. ;o))








onsdag 19. mars 2014

Morgondagens niste


 Blir av og til lei av grovskivene som niste. Bestemte meg for å lage ei god niste til i morgon. Inspirert av måten å lage kanelbrød på, tenkte eg at det kan no gjerast med ost og skinke i staden for.
Så tenkt, så gjort.

Nistebrød med ost og spekeskinke

25 g gjær
100 g gresk yoghurt
2 ss olivenolje (gjerne med smak)
2,5 dl lunka vatn
370 g kveitemjøl
150 g sikta rugmjøl
1 ts grovt havsalt
fyll:
ca. 12 skiver serranoskinke
2 kuler mozzarellaost
1 neve nyraspa parmesanost + litt meir til å strø på toppen
oregano
litt fersk timian (om du har)
raud pesto (eg hadde eit glas med Pesto Trapanese frå Oliviers)

Ha alle ingrediensane til deiga i ein bolle, og elt godt til du har ei fin og glatt deig som slepper bollen. Eg brukar miksar og let han gå i ca. 5 min. La deiga etterheve ein times tid. Når deiga er ferdig heva bakar, du ho ut til ein leiv på ca. 50 x 40 cm. Smør eit tynt lag med pesto. Ha deretter på spekeskinke. Eg la på to skiver i høgda og tenkte på at eg skulle sleppe å skjere i spekeskinka når eg etterpå skulle dele leiven i seks delar. Riv mozzarellakulene og strø utover leiven. Ha over parmesanosten, oreganokrydder og litt fersk timian om du har. Del så deiga i seks delar (horisontalt). Legg dei så oppå kvarandre. Det ser då slik ut.

Gjer klar ei stor brødform med bakepapir i. Så deler du deiga i seks delar ein gong til. Reis opp delane etter kvart som du legg dei i brødforma tett i tett. Strø litt raspa parmesanost på toppen, og ha på litt meir oregano. Set til etterheving i ca. 40 min. Varm opp steikeomnen til 200 grader. Når brødet har heva, steiker du det på nederste rille ca. 45-50 min. Det er nok nydeleg å ete med ein gong, men då er det vel lurt å rive det. Vi måtte smake og venta til det hadde avkjølt seg litt og skar då skiver av brødet. Skal bli herleg niste i morgon saman med ein god salat og litt heimelaga dressing.
Prøv du òg.  ;o))





tirsdag 18. mars 2014

Tysdagskos

I dag har eg hatt ein roleg og fin kveld. Kosa meg med bøker og fyrt i omnen. :)) Vi er berre to heime og ved middagsbordet vart vi einige om at ein smoothie litt seinare på kvelden hadde vore godt. Så då laga eg ein forfriskande smoothie til oss.

 Tropisk smoothie
2 porsjonar
1 dl vaniljeyoghurt
1 dl naturell yoghurt
1 dl god appelsinjuice (eg brukte Sunniva sin juice med appelsin frå Valencia)
1 banan
2 pk coopen sin frosne fruktblanding med ananas, mango og papaya (det er 4 mindre pakkar i ein pose, eg brukte 2)

Køyr det i blenderen til du har ein glatt og fin konsistens. Server og kos deg!





Related Posts Plugin for WordPress, Blogger...